TANZANIA NA CHINA ZAJIPANGA KUWANOA VIJANA STADI ZA UFUNDI

Imewekwa : July 20th, 2023

Waziri wa Elimu, Sayansi na Teknolojia Prof. Adolf Mkenda amesema serikali imedhamiria kuimarisha Elimu ya Ufundi na Mafunzo ya Ufundi Stadi ili kuwawezesha wahitimu kuwa na viwango vya kuajirika Kitaifa na Kimataifa.

Prof. Mkenda ametoa kauli hiyo Julai 14, 2023 Kibaha mkoani Pwani, wakati akifungua mkutano kuhusu ushirikiano Kati ya Serikali ya Tanzania na China katika masuala ya Elimu ya Ufundi.

"Semina hii inaendana na mipango ya Serikali kupitia Sera mpya yenye mageuzi makubwa ambayo inaifanya elimu ya Ufundi Stadi sasa kuanza kutolewa kuanzia ngazi ya Elimu ya Sekondari, kwa kufanya hivyo vijana wengi wa Kitanzania watakuwa na Ujuzi na utayari wa kufanya kazi za kuajiriwa au kujiajiri". Alisema Prof. Mkenda.

Ameongeza kuwa ushirikiano wa nchi hizo mbilo utaisaidia Tanzania kufikia haraka maendeleo ya kiuchumi, kwani China ina mifumo imara katika

mafunzo ya Ufundi, Uhandisi.

"Tuna kazi kubwa sana kujifunza kutoka China wenzetu wana utaalam, angalia mafundi wao wanaokuja kusimamia kazi. Hivyo tunahitaji mafundi wetu wawe na uwezo wa kufanya kazi vizuri kama wao" amebainisha Prof. Mkenda.

Akizungumzia matokeo ya ushirikiano huo, Prof. Mkenda amesema tayari Taasisi ya Teknolojia ya Dar es Salaam (DIT) imeanzisha program ya shahada ya miaka Minne, ambapo wanafunzi watakaochukuliwa mwaka wa Kwanza watasoma hapa Tanzania, miaka miwili watasoma China, halafu watarudi hapa mwaka mmoja, na hivyo watapata degree ya hapa Tanzania, pamoja na diploma ya China.

"Tumeanza na Wanafunzi 30, sasa hivi wamepelekwa China kufanya mafunzo kwa vitendo, watarudi watasoma na baadae tena watarudi China" Amefafanua Prof. Mkenda.

Kwa upande wake Katibu Mtendaji wa Baraza la Taifa Elimu ya Ufundi na Mafunzo ya Ufundi Stadi (NACTVET) Dkt. Adolf Rutayuga amesema hatua ya mashirikiano hayo, ni sehemu ya utekelezaji wa maagizo ya Serikali, kuunganisha Vyuo vya Kati vya hapa nchini na vile vya Nchi zililoendelea kiteknolojia katika Elimu ya Ufundi.

Amesema vijana watakaopata fursa katika mpango huo wataleta chachu na msingi wa maendeleo ya kiuchumi kwani watakuwa na ujuzi katika viwango vya kimataifa.