TARURA YAZIDI KUIMARISHA MAWASILIANO YA MAKAO MAKUU YA MOMBA

Imewekwa : July 19th, 2023

Wakala wa Barabara mjini na vijijini (TARURA) Wilaya ya Momba imezidi kuimarisha mawasiliano ya barabara zinazounganisha makao makuu ya wilaya ya Momba na Halmashauri zake za Momba na Tunduma baada kuifanyia matengenezo makubwa Barabara ya Chapwa-Chindi- Msangano ambayo imegharimu zaidi ya shilingi Bilioni 1.

Barabara ya Chapwa-Chindi-Msangano ambayo imefanyiwa matengenezo kwa kuweka changarawe urefu wa kilomita 29, kujenga makaravati makubwa 5 na madogo yapatayo 10 pamoja ujenzi wa mifereji ya maji mita 1000.

Kaimu Maneja wa TARURA Wilaya ya Momba, Mhandisi Selemani Mkopi amesema awali barabara ya Chapwa-Chindi-Msangano ilikuwa inapitika kwa shida sana haswa nyakati za mvua Hali iliyopelekea TARURA kuomba fedha Serikali kuu na kwenye bajeti 2022/2023 kiasi cha shilingi Bilioni 1,042,259,795. kilitolewa kwa ajili ya matengenezo.

Mkuu wa Mkoa wa Songwe, Mhe. Dkt. Francis Michael akiwa katika ukaguzi wa Barabara ya Chapwa-Chindi-Msangano, Julai 19 amempongeza Rais wa Tanzania, Mhe. Dkt. Samia Suluhu Hassan kwa kuendelea kutoa fedha za miradi ya Barabara kwa Mkoa wa Songwe na kuwawezesha TARURA kufanikisha miradi.

"Nawapongeza TARURA Songwe kwa usimamizi wa miradi mbalimbali ya Barabara kazi nzuri ila msisite kuchukua hatua kwa wakandarasi wazembe ambao hawataki kutekeleza majukumu yao kwa wakati" Mhe. Dkt. Francis Michael.

Mkuu wa Wilaya ya Momba, Mhe. Fack Lulandala amesema katika kufanikisha kuifungua Barabara ya Chapwa-Chindi-Msangano Serikali imeleta fedha shilingi Bilioni 3 za ujenzi wa daraja la Nkana ambalo hadi kukamilika kwake litachukua miezi 24.

"Daraja hili litakuwa kubwa kwa upili kwa Mkoa wa Songwe likitangulia na lile la Kamsamba tunashukuru tayari mkandarasi amepatikana kazi iliyobaki ni sisi Serikali kumkabidhi kazi rasmi mbele ya wananchi ili wajue Serikali yao inasikia na kutekeleza changamoto zao" Mhe. Fack Lulandala Mkuu wa Wilaya ya Momba.