TD Chaurembo Amshukuru Rais Samia kwa Maono Yake ya Kuboresha Huduma za Afya

Imewekwa : March 1st, 2025

Na Benton Nollo, Tunduma TC

Mkurugenzi wa Halmashauri ya Mji Tunduma, Mariam Chaurembo amemshukuru Rais wa Jamhuri ya Muungano wa Tanzania, Mhe. Dkt. Samia Sukuhu Hassan kwa dhamira yake ya dhati na maono ya kuboresha huduma za afya katika Halmashauri hiyo.

TD Chaurembo ameyasema hayo alipokuwa akizungumza wakati wa maadhimisho ya Siku ya Wanawake Duniani ambayo kwa Halmashauri hiyo yamefanyika katika Hospitali ya Mji Tunduma tarehe 01 Machi 2025 ambapo Mgeni Rasmi alikuwa Mkuu wa Wilaya ya Momba Mhe. Elias Mwandobo.

Chaurembo amesema wakati Wanawake wa Tunduma wanasherehekea siku hiyo muhimu, wanamshukuru sana Rais Samia kwa kujenga Hospitali mpya ya Mji wa Tunduma yenye miundombinu ya kisasa ambapo mpaka sasa zimeshatumika zaidi ya shilingi bilioni 6 katika ujenzi wa majengo pamoja na vifaa tiba na huduma zimeshaanza kutolewa.

Pia, Mkurugenzi Chaurembo amesema hivi karibuni Serikali imeleta fedha shilingi bilioni 2.3 kwa ajili ya ujenzi wa Jengo la ghorofa la Mama na Mtoto pamoja na Jengo la Upasuaji.

"Mheshimiwa Mkuu wa Wilaya katika kipindi cha miaka minne ya uongozi wa Rais Samia, ameleta fedha ambazo zimejenga Vituo vya Afya Sita vipya ambavyo ni Chiwezi, Chapwa, Mpande, Chipaka, Tunduma TC na Mwakakati na vimeshakamilika kwa asilimia 99." Amesema Chaurembo na Kuongeza;

"Wanawake wa Tunduma sasa hivi hatutateseka tena kutembea umbali mrefu kufuata huduma za afya...maana kati ya Vituo hivyo tayari Kituo cha Afya Chipaka, Kituo cha Chiwezi vimeanza kutoa oparesheni ya Mama na Mtoto".

Pia, Chaurembo amesema kwa mwaka wa fedha 2024/2025 Halmashauri ya Mji Tunduma imetoa mikopo yenye thamani ya shilingi bilioni 4.6 inayotokana na Asilimia Kumi (10%) ya mapato ya ndani ya Halmashauri kwa vikundi wa Wanawake, Vijana na Watu wenye Ulemavu.

Kadhalika, Chaurembo amempongeza na kumshukuru Rais Samia kwa kujenga Shule mpya ya Sekondari ya Wasichana ya Dkt. Samia SH ambayo mpaka sasa ujenzi wake mpaka sasa umegharimu shilingi bilioni 6.1.

Siku ya Wanawake Duniani husherehekewa kila mwaka tarehe 08 Machi ambapo kwa Mkoa wa Songwe kwa mwaka huu (2025) maadhimisho hayo yatafanyika wilayani Songwe.

Matukio katika Picha: