TUNDUMA YASHIKA NAFASI YA SITA YA LISHE KITAIFA 2022/2023

Imewekwa : August 29th, 2023

Na William Maganga - Tunduma

Serikali ya Jamhuri ya Muungano wa Tanzania kupitia Ofisi ya Rais -TAMISEMI  imetoa takwimu ya tathimini ya saba ya utekelezaji wa mkataba wa lishe kwa mwaka 2022/2023

Tathimini hiyo imetolewa Agosti 29,2023 ambapo Halmashauri ya Mji Tunduma imeshika nafasi ya sita (6) kitaifa kati ya Halmashauri mia moja themanini na nne (184), huku mkoa wa Songwe ukishika nafasi ya saba (7) kati ya mikoa ishirini na sita (26) ya Tanzania bara.

Halmashauri ya Mji Tunduma imepanda kwa kasi katika afua za lishe kitaifa kutoka nafai ya 53 Mwaka 2021/2022 hali kufikia nafasi ya 6 kwa mwaka wa fedha 2022/2023 na kuifanya kuwa kinara kwa Mkoa wa Songwe

Mkurugenzi wa Halmashauri ya Mji Tunduma Ndugu Philemon Magesa  amesema Tunduma  imeshika nafasi hiyo kutokana na hatua madhubuti za utekelezaji wa afua mbalimbali za lishe na kutoa elimu shirikishi kwa jamii juu ya lishe kupitia vikundi vya unasihi wa masuala ya lishe katika mitaa yote sabini na moja (71) ya Halmashauri ya Mji Tunduma. Lengo la elimu hiyo ni kuepusha changamoto za lishe duni kama vile udumavu, uzito pungufu na upungufu wa wekundu wa damu kwa wajawazito pia utapiamlo kwa Watoto.

Aidha Bw. Magesa ametaja mojawapo ya kikundi cha unasihi wa lishe ni  Juhudi-Mpemba kinachotoa elimu na kuhamasisha jamii kuhusu matumizi ya lishe bora, upimaji wa hali ya lishe kwa Watoto na kuwaunganisha Watoto wenye hali duni ya lishe kwenye vituo vya kutolea huduma za afya.

Bw. Magesa ameongeza kuwa  katika Kipindi cha robo ya pili (2) na ya tatu (3) ya  2022/2023 jumla ya watoto 1305 kuanzia miezi 0 – 59  katika kata ya Mpemba walipimwa hali zao za lishe kwa kutumia kipimo cha Mzingo wa Mkono (MUAC TAPE) ambapo Watoto 36 walikuwa na utapiamlo huku mtoto mmoja akiwa na utapiamlo mkali. Kwasasa Watoto hao wameunganishwa katika matibabu na wanaendelea kupata matibabu sitahiki.

Kupitia kauli mbiu ya “Lishe ni msingi wa maendeleo sote tuwajibike”, Mkurugenzi wa Halmashauri ya Mji wa Tunduma ametoa wito kwa jamii kushiriki kikamilifu kwenye suala la lishe kwani ni wajibu wa jamii nzima, kwani ushiriki wao utapunguza matatizo yatokanayo na lishe kama vile udumavu na utapiamlo kwa Watoto.