Ufahamu Mradi wa Uboreshaji Huduma ya Majitaka Tunduma

Imewekwa : December 4th, 2023

Na Benton Nollo, Tunduma TC

Mradi wa Uboreshaji Huduma ya Majitaka katika Mji wa Tunduma umejengwa na Serikali ya Tanzania kwa kushirikiana na Serikali ya Ujerumani kupitia mradi wa upatikanaji wa maji na mabadiliko ya Tabianchi kwa gharama ya shilingi milioni 482.2.

Serikali ya Tanzania na Serikali ya Ujerumani zimekuwa na ushirkiano wa muda mrefu kupitia Wizara ya Maji nchini Tanzania na Wizara ya Ushirikiano wa Kiuchumi na Maendeleo ya Shirikisho la Ujerumani, BMZ.

Kupitia ushirikiano huo, Shirika la Misaada la Kijerumani – GIZ linatekeleza miradi ya Upatikanaji wa Maji na Mabadiliko ya Tabianchi katika maeneo ya mjini hapa nchini Tanzania. Awamu ya Kwanza ya mradi huo ilianza kutekelezwa mwaka 2019 hadi 2022 na Awamu ya Pili imeanza mwaka 2022 hadi 2025 katika kukabiliana na UVIKO – 19 ambapo Halmashauri ya Mji Tunduma ni sehemu ya Wanufaika wa mradi.

Akizungumza katika mahojiano maalum Mkurugenzi wa Halmashauri ya Mji Tunduma, Philemon Magesa amesema lengo la mradi huo ni kuboresha afya na usafi wa mazingira na kutokomeza magonjwa ya mlipuko katika Mji wa Tunduma ambapo ametumia fursa hiyo kumshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan kwa dhamira yake ya dhati ya kutatua kero mbalimbali zinazowakabili Wananchi kwa kuleta fedha za miradi ya maendeleo.

Magesa amesema tangu Halamashauri ya Tunduma ianzishwe Mwezi Julai, 2015 suala la majitaka katika Mji huo limekuwa na changamoto kubwa katika udhibiti wake kwa kuwa majitaka yanazalishwa kwa kiwango kikubwa kutokana na kukua kwa mji na kuondezeka kwa shughuli za kiuchumi.

“Majitaka yanazalishwa kwa kiwango kikubwa kwenye kaya za watu, kwenye maeneo ya kibiashara, na hasa ukizingatia Tunduma ni mji wa kibiashara, kwa hiyo kadiri mji unavyokua ndivyo hivyo hivyo na uzalishaji wa taka zote ngumu na maji zinazalishwa kwa wingi…maeneo ambayo tulikuwa tumechagua kwa ajili ya kuhifadhi majitaka hayakuwa na viwango vyenye ubora unaotakiwa kisayansi…hivi karibuni Serikali imeweza kutupatia mradi wa kudhibiti majitaka uliopo Kata ya Kaloleni ambapo tayari umeshakamilika.” Amesema Magesa.

Magesa amesema Halmashauri ya Mji Tunduma inatarajia mradi huo kuwa chanzo cha mapato kwa kuwa wadau wenye magari ya kunyonya majitaka watakapokuwa wanatoa huduma hiyo kwa Wananchi watalipwa hivyo pindi nao wanapokwenda kumwaga majitaka katika eneo hilo kutakuwa na tozo la kuchangia, hivyo Halmashauri itapata mapato kutoka na magari ya majitaka yatakavyokuwa yanakwenda kumwaga majitaka katika mradi huo.

“Mradi huu kwetu ni chanzo kingine cha mapato, hivyo kwa kuwa hii ni fursa ya kuongeza mapato kupitia mradi huu, sisi kama Halmashauri kupitia bajeti ya mwaka wa fedha 2023/2024 tumetenga fedha kwa ajili ya kununua gari la majitaka la Halmashauri lenye ujazo wa lita 8,000 ambalo litakuwa kazi yake ni kunyonya majitaka kwenye maeneo ambayo wanahitaji huduma hiyo na kupeleka kwenye mradi huo ambao tayari umeshakamilika na upo tayari kutumika.” Amesema Magesa.

Kwa upande wake Kaimu Mkurugenzi Mtendaji wa Mamlaka ya Maji na Usafi wa Mazingira Tunduma, Fatuma Malende amesema mradi huo umetekelezwa na Mkandarasi Entercecon Limited kwa gharama ya shilingi milioni 482.2 chini ya Mhandisi Mshauri BORDA kwa kushirikiana na Wakala wa Maji na Usafi wa Mazingira Vijijini – RUWASA Mkoa wa Songwe.

Malende amesema mradi huo ulijumuisha shughuli za usawazishaji wa eneo la mradi (land scaping), kujenga miundombinu ya uchakataji wa majitaka, kujenga ofisi na choo, uzio, uwekaji wa mfumo wa umeme na kujenga jengo la kukaushia na kutunzia mbolea pamoja na shamba la migomba ya ndizi.

“Mradi huu umetekelezwa kwa awamu mbili, awamu ya kwanza ya utekelezaji ilianza mwezi Agosti, 2021 hadi Disemba, 2022 na awamu ya pili ilianza kutekelezwa mwezi Aprili, 2023 hadi Juni, 2023, hivyo mradi huu kwa sasa upo katika kipindi cha matazamio hadi mwezi Januari, 2024.” Amesema Malende.

Kwa niaba ya Wananchi wa Tunduma, Mwenyekiti wa Halmashauri ya Mji Tunduma, Ayubu Mlimba ameishukuru Serikali ya Awamu ya Sita inayoongozwa na Rais Dkt. Samia Suluhu Hassan kwa kutekeleza mradi huo kwa kuwa una manufaa kwa Wananchi wa Tunduma.

Matukio Katika Picha: