Utumishi wa Umma ni Kutumika: DC Mwandobo

Imewekwa : March 5th, 2025

Na Benton Nollo, Tunduma TC

Mkuu wa Wilaya ya Momba, Mhe. Elias Mwandobo amesema unapochagua kuwa Mtumishi wa Umma ni wazi kuwa umeapa kuwatumikia Wananchi katika eneo lako ambako Serikali imekuajiri.

Mhe. Mwandobo ameyasema hayo alipokuwa akifungua mafunzo maalum kwa Watumishi wapya ambao wameajiriwa na Serikali hivi karibuni katika Halmashauri ya Mji Tunduma, ambayo yamefanyika kwenye Ukumbi mdogo wa Mikutano wa Halmashauri hiyo tarehe 05 Machi 2025.

"Niwaambie, kufanya kazi serikalini ni heshima kubwa sana, na ukitaka kuona umuhimu wa hilo angalia nchi yetu ina takriban Watanzania zaidi ya milioni 60 kwa Sensa ya Watu na Makazi ya mwaka 2022 lakini umeaminiwa wewe, ukaajiriwa...hivyo siyo jambo dogo." Amesema Mhe. Mwandobo na kuongeza;

"Utumishi wa Umma ni mchakato, mpaka nyie mmepatikana ina maana kuna michakato ya kuchujwa mmepitia...msilichukulie jambo hilo kwa wepesi, linauzito wake na ukitambua uzito huo utawajibika ipasavyo katika sehemu yako ya kazi ili kuleta matokeo chanya ambayo ndiyo matarajio ya Mwajiri wetu ambaye ni Serikali."

DC Mwandobo amesema mafunzo yanayotolewa, ni wajibu wa Serikali ambao huutimiza kwa kila anayeingia kuwatumikia Watanzania ili iwe dira katika kutekeleza majukumu husika kwa umma.

Aidha, Mheshimiwa Mwandobo ametumia nafasi hiyo kuwakumbusha Watumishi hao kuwa, katika utekelezaji wa majukumu yao wanapaswa kuzingatia Sheria, Kanuni, Taratibu na Miongozo inayotolewa na Serikali.

"Unapoamua kuja katika utumishi wa umma, tambua kuna Sheria, Kanuni, Taratibu na Miongozo mbalimbali ambayo ni lazima uifuate...hivyo, hatma ya utumishi bora ipo mikononi mwako...mnafundishwa leo ili msikiuke." Amesema Mhe. Mwandobo.

Halmashauri ya Mji Tunduma kupitia Divisheni ya Utawala na Usimamizi wa Rasirimali Watu imeendesha mafunzo hayo ya siku moja kwa Watumishi wote wa ajira mpya kupitia Wakufunzi kutoka Chuo cha Serikali za Mitaa - Hombolo, Dodoma.

Matukio katika Picha: