Wasimamizi Wasaidizi Ngazi ya Kata, Mtaa, Waandikishaji Wapiga Kura Waapisha, Kupatiwa Mafunzo

Imewekwa : October 2nd, 2024

Na Benton Nollo, TTC

Msimamizi wa Uchaguzi wa Serikali za Mitaa Halmashauri ya Mji Tunduma, Mariam Chaurembo amesimamia zoezi la uapishwaji na utoaji wa mafunzo maalum kwa Wasimamizi Wasaidizi ngazi ya Kata (15), Mitaa (71) na Waandikishaji Wapiga Kura takribani 196.

Mafunzo hayo yamefanyika kwenye Ukumbi wa Mikutano wa Shule ya Sekondari Tunduma TC mjini Tunduma tarehe 02 Oktoba 2024, yakilenga kuwaandaa Wasimamizi hao kusimamia mchakato wa Uchaguzi wa Serikali za Mitaa unaotarajiwa kufanyika tarehe 27 Novemba 2024.

Chaurembo amewasisitiza Washiriki hao kuzingatia kiapo chao kwa kufanya kazi kwa bidii na uadilifu mkubwa kwa kuzingatia umuhimu wa ushiriki wa Wananchi katika uchaguzi.

Msimamizi huyo alitoa maelekezo ya kina kuhusu taratibu za uchaguzi, ikiwemo sifa za kugombea, sifa za wapiga kura, na mchakato wa kujiandikisha kupiga kura.

Alibainisha kuwa Wananchi wanapaswa kushiriki kikamilifu kwa mujibu wa sheria na kanuni za uchaguzi, huku wasimamizi wakihakikisha kuwa mchakato mzima unaendeshwa kwa uwazi na haki.

Chaurembo kwa kushirikiana na Waratibu wa Uchaguzi ngazi ya Halmashauri  walieleza na kufafaanua kwa kina Kanuni za Uchaguzi wa Serikali za Mitaa kwa mwaka 2024, michakato ya kufuatwa na Wasimamizi wa Uchaguzi katika kuhakikisha haki na uwazi vinafikiwa.

Chaurembo ametoa wito kwa Washiriki hao kuhakikisha kuwa kila hatua inazingatia miongozo iliyotolewa na Waziri wa Nchi, Ofisi ya Rais, Tawala za Mikoa na Serikali za Mitaa, tarehe 15 Agosti 2024, kama Mwongozo wa uchaguzi wa mwaka huu (2024).

Katika mafunzo hayo, Wasimamizi Wasaidizi walipata fursa ya kula kiapo cha uaminifu, kiapo ambacho kinawataka kuwa waaminifu na waadilifu katika utekelezaji wa majukumu yao ya kusimamia uchaguzi. Kiapo hicho ni sehemu muhimu ya maandalizi ya kuhakikisha kuwa wasimamizi wanafuata sheria na taratibu wakati wote.

Mafunzo hayo ni sehemu ya maandalizi muhimu kuelekea Uchaguzi wa Serikali za Mitaa unaotarajiwa kufanyika tarehe 27 Novemba 2024, ambapo Wananchi wa Tunduma na maeneo mengine nchini watapata fursa ya kugombea na kuchagua viongozi watakaowaongoza katika Mitaa yao.

Matukio katika Picha:

Hakimu Mkazi Mahakama ya Wilaya ya Momba, Mhe. Timothy Lyon akitoa maelezo kabla ya kuwaapisha Wasimamizi Wasaidizi ngazi ya Kata (15), Mitaa (71) na Waandikishaji Wapiga Kura takribani 196 kwa ajili ya Uchaguzi wa Serikali za Mitaa 2024 katika Halmashauri ya Mji Tunduma, tukio ambalo lilifanyika kwenye Ukumbi wa Mikutano wa Shule ya Sekondari Tunduma TC tarehe 02 Oktoba 2024.

Wasimamizi Wasaidizi ngazi ya Kata, Mitaa na Waandikishaji Wapiga Kura wakila kiapo cha uaminifu mbele ya Hakimu Mkazi wa Mahakama ya Wilaya ya Momba, Mhe. Timothy Lyon,  kwa ajili ya kushiriki shughuli za Uchaguzi wa Serikali za Mitaa 2024 katika Halmashauri ya Mji Tunduma, tukio ambalo lilifanyika kwenye Ukumbi wa Mikutano wa Shule ya Sekondari Tunduma TC tarehe 02 Oktoba 2024.

Msimamizi wa Uchaguzi wa Serikali za Mitaa Halmashauri ya Mji Tunduma, Mariam Chaurembo akizungumza wakati wa Semina kwa Wasimamizi Wasaidizi ngazi ya Kata, Mitaa na Waandikishaji Wapiga Kura kwa ajili ya kushiriki shughuli za Uchaguzi wa Serikali za Mitaa 2024 katika Halmashauri ya Mji Tunduma, tukio ambalo lilifanyika kwenye Ukumbi wa Mikutano wa Shule ya Sekondari Tunduma TC tarehe 02 Oktoba 2024.

Baadhi ya Wajumbe wa Kamati ya Uratibu wa Uchaguzi wa Serikali za Mitaa Halmashauri ya Mji Tunduma, wakiwasilisha mada mbalimbali kwa nyakati tofauti wakati wa Semina kwa Wasimamizi Wasaidizi ngazi ya Kata, Mitaa na Waandikishaji Wapiga Kura kwa ajili ya kushiriki shughuli za Uchaguzi wa Serikali za Mitaa 2024 katika Halmashauri hiyo, tukio ambalo lilifanyika kwenye Ukumbi wa Mikutano wa Shule ya Sekondari Tunduma TC tarehe 02 Oktoba 2024.

Wasimamizi Wasaidizi ngazi ya Kata, Mitaa na Waandikishaji Wapiga Kura wakisikiliza kwa makini mafunzo wakati wa semina kwa ajili ya kushiriki shughuli za Uchaguzi wa Serikali za Mitaa 2024 katika Halmashauri ya Mji Tunduma kwenye Ukumbi wa Mikutano wa Shule ya Sekondari Tunduma TC tarehe 02 Oktoba 2024. (Picha zote na Julius Evandino).