Waziri kuu Majaliwa Azindua Kikao Kazi cha 15 cha Maafisa Utamaduni, Maafisa Maendeleo ya Michezo

Imewekwa : April 22nd, 2025

Waziri Mkuu wa Jamhuri ya Muungano wa Tanzania, Mhe. Kassim Majaliwa, ametoa wito kwa Watanzania kutokubali kuwa watumwa wa tamaduni za kigeni, bali wajivunie, wahifadhi na waendeleze tamaduni zao za asili.

Mhe. Majaliwa alitoa kauli hiyo wakati wa kufungua kikao kazi cha 15 cha Maafisa Utamaduni na Maafisa Maendeleo ya Michezo kutoka halmashauri mbalimbali nchini leo tarehe 22 Aprili 2025 katika Ukumbi wa Kimataifa wa Mwl. Julius Nyerere(JINCC)Dar es Salaam. Kikao hicho kililenga kujadili maendeleo ya sekta muhimu za utamaduni, sanaa na michezo.

Katika hotuba yake, Waziri Mkuu alisisitiza umuhimu wa kila halmashauri nchini kutenga bajeti maalum kwa ajili ya maendeleo ya sekta hizo. Aidha, alielekeza kuwa vitengo vya utamaduni, sanaa na michezo viwe na maafisa maalum watakaosimamia kikamilifu utekelezaji wa sera, mipango na miradi ya kukuza sekta hizo.

“Ni lazima tutambue thamani ya urithi wetu wa kitamaduni na kuhakikisha tunautunza kwa vizazi vya sasa na vijavyo. Tuwe mstari wa mbele kutumia lugha ya Kiswahili kwa usahihi katika shughuli zetu za kila siku kama njia mojawapo ya kuenzi utamaduni wetu,” alisema Mhe. Majaliwa.

Kauli ya Waziri Mkuu ni mwito wa kuchukua hatua thabiti katika kukuza na kulinda utambulisho wa Taifa kupitia utamaduni, sanaa na michezo. Alisisitiza kuwa sekta hizi ni nyenzo muhimu za maendeleo ya kijamii na kiuchumi.

Katika hitimisho la hotuba yake, Waziri Mkuu aliwataka wakurugenzi wa halmashauri kuwasikiliza maafisa wa utamaduni, sanaa na michezo, huku akiwasihi maafisa hao kuwa wabunifu na kusimamia kwa weledi majukumu yao kwa maslahi mapana ya Taifa.